Dagbók Tótu litlu

Ég held að ég hafi einhvern tíma áður sagt frá konunni sem sagðist "liggja í súpunni" og hinni sem taldi það óþarfa að vera að "finna upp eplið" aftur og aftur. Ég man hins vegar ekki hvort ég var búin að segja ykkur frá konunni sem var þess handviss að unglingarnir, sem hún átti að hafa eftirlit með, væru með áfengi "undir höndunum".

Ég fór í vinnuna í gær og aftur í dag, ekki allan daginn, bara nokkra tíma. Það er ágætt að byrja rólega. Annars hefur allt gengið á meðan ég var í burtu. Einn hættur og byrjaður aftur, tilraun samkeppnisaðila til að yfirtaka fyrirtækið farin út um þúfur og alls konar uppákomur aðrar. Mér varð á orði að ég mætti bara ekki líta af þeim án þess að allt færi í vitleysu. Og fékk bara - "Já, mamma" - svar. Hvort ætli það segi meira um mig en þá.

Í gær fór ég í vinnuna og færði vinnufélögum mínum smávegis með kaffinu - svona í tilefni dagsins. Auðvitað var ýmislegt spjallað eins og gengur og einn ágætur drengur var að lýsa einhverjum illa stöddum einstaklingi og notaði líkinguna "eins og vængbrotinn hestur" !! Pegasus, kannski, en hvað veit maður. Hann er jú frá Eskifirði, drengurinn.

Og í framhaldi af því: Hafið þið heyrt orðatiltækið: "Hann kom eins og þjófur úr heiðskíru lofti."

enda er ég ári eldri í dag en í gær. Mér var bent á það áðan að ég yrði ekki vinsæl ef ég færi að kasta eggjum í fólk !
HAAAA ?? Ég vissi ekki hvað viðkomandi var að meina !
En þá hef ég víst gert þau mistök í síðustu færslu að hóta því að berjast "með oddi og eggi" fyrir nafninu Fljótsdalshérað á nýtt sveitarfélag.

Ókei, það yrði frekar subbulegt, en hugmyndin er alls ekki fráleit !

Það er búið að vera rafmagnslaust hérna hjá okkur meira og minna um helgina. Í gær var rafmagnið tekið af kl. 10 og kom ekki aftur fyrr en að verða 6 síðdegis í gær. Svipaða sögu er að segja í dag. Varð ekki svo mikið vör við þetta í gær því við hjónin vorum að heiman mest allan daginn í einhverju framboðsfári. Bóndinn er jú efsti maður á L-listanum og verður að standa sína plikt.
Í dag var ég heima og sá eiginlega eftir því, þar sem húsið er hitað með rafmagni og eftir fjögurra tíma rafmagnsleysi var orðið hrollkalt í húsinu, hvað þá þegar rafmagnið kom aftur eftir 7 tíma. Ég vona bara að þessum RARIK-aulum hafi nú tekist að finna og gera við bilunina sem þeir eru reyndar búnir að þykjast finna og gera við einum þrisvar sinnum áður. Sé fram á að þurfa að fá mér einhvers konar varaafl fyrir veturinn, því það virðist ekki vera neinu að treysta í rafmagnsmálum.

Ástæðan fyrir kosningunum núna er sameining 3 sveitarfélaga. Það gefur auga leið að nýtt sveitarfélag verður að fá nýtt nafn. Ýmsar tillögur hafa heyrst en ég er alveg gallhörð á því að "Fljótsdalshérað" er eina nafnið sem er rökrétt og mun berjast með oddi og eggi fyrir að það verði fyrir valinu. Einhverjir segja að það sé ófært þar sem Fljótsdalshreppur sé ekki með í sameiningunni, en ég lýsi frati á það og bendi á Skagafjörð máli mínu til stuðnings. Veit ekki betur en að þar heiti sveitarfélagið Skagafjörður þó einhverjir hreppar í Skagafirði standi utan við það.
Ég get ekki hugsað þá hugsun til enda að einhverju lágkúru-ónefni (eins og Lagarbyggð) verði klínt á sveitarfélagið og hið gamla góða nafn Fljótsdalshérað falli nánast í gleymsku. Þið sveitungar mínir og verðandi sveitungar sem hugsanlega lesið þessi orð: Ég heiti á ykkur að kjósa rétt - í tvöföldum skilningi !