Dagbók Tótu litlu

Konráð hinn kynlegi skrifar pistil um austurland í dag. Venjulega finnst mér Konni hafa nokkuð til síns máls og setja fram nýjar hliðar á ýmsu. En nú finnst mér sá hinn ágæti maður vera farinn að tala í svipuðum tón og Gunnar Birgisson. Hvað á maður sem býr í höfuðborginni með að halda því fram að það sé ekkert að gerast á austurlandi nema framkvæmdir ? Þú ættir að vita betur, kæri Konni, en að endurtaka það sem heyrist og sést í fjölmiðlum sem einhvern endanlegan sannleika. Þetta er nefnilega eins og með íþróttafréttamennina og Vasa-gönguna. Þar sem verið er að byggja upp á jákvæðan hátt og án allrar æsifréttamennsku er yfirleitt ekki nefnt í fjölmiðlum. Vissulega hefur verið mikill uppgangur hér undanfarið og ekki bara í kringum álver og virkjun. Ég vil líka meina, Konni minn, að það sé ekkert að okkar harmonikku- karlakóra-, þorrablóta-, landsbyggðarmenningu ! Menning er allt sem fólk gerir !
Flokkast það ekki undir menningu að eyða árum í að búa til listaverk úr grjóti til að setja á arininn hjá sér, eða koma saman sér til skemmtunar, semja ljóð eða rækta skóg ! Er ekkert skapandi að byggja upp gróðrarstöðvar, rækta landið, efla skóla og stofnanir til að skapa börnunum okkar betra líf. Það er menning líka?
Menning er ekki bara eitthvert listasnobb sem hefur lítið gildi nema fyrir örfáa einstaklinga. Menning er allt sem fólk gerir, hvort sem það tilheyrir listum, daglegu lífi eða starfi. Og hana nú !

Í haust pöntuðum við hjónin okkur ferð á hlýjan og sólríkan stað, ásamt Rannveigu "Lötu-Grétu" vinkonu okkar. Þá fannst mér þetta svo óralangt í burtu, en svo er þetta bara að bresta á. Við förum í næstu viku. Það er full þörf á þessari ferð, því við höfum öll unnið mikið undanfarið og eigum sannarlega skilið að fá nokkra náðuga daga í sól og hita.
Það er smámisskilningur í gangi milli Lötu-Grétu og okkar. Við höldum því fram að hún fari með sem "stuepige" fyrir okkur. Sjái um innkaup, færa okkur morgunmatinn í rúmið og alla svona helstu þjónustu. Hún ætlar hins vegar að haga sér eins og táningur, liggja í leti með mp3-spilarann á fullu, kvarta sáran ef enginn tínir upp spjarirnar hennar, skolar sundbolinn eða tekur til hjá henni.
Við verðum að fara að finna einhvern milliveg þarna ef ekki á að fara illa.

Bræðrum öskudags hefur fækkað. Þeir eiga að vera 18, en urðu bara 9 þetta árið. Ekki nema þessir dagar séu blautu bræðurnir. Vonandi verða þeir ekki 9.